Eng vangin nge Isua kan mamawh ?

Bible     :     Matthaia 11:28,29; Marka 10:46;
                   Luka 2:10-11; Rom 1:1-5; 1:16-17, .

Mat 11:28 "Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. 29 Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang....



Marka 10:46  Tin, Jeriko khua an lo thleng a, tin, Isua Jeriko atang chuan a zirtirhote leh mipui tam tak nen a chhuah laiin kutdawt mitdel, Timaia fapa Bartimaia chu kawng sirah a lo thu a. 47 Tin, Nazaret Isua a ni tih a hriat veleh, "Isu, Davida Fapa, mi khawngaih rawh," tiin a au ta a.  48 Tin, mi tam takin ngawi turin an hau va; nimahsela ani chuan, "Davida Fapa, mi khawngaih rawh," tiin a au zual sauh va. 49 Tin, Isua a ding a, "Amah chu han ko teh u," a ti a. Tin, mitdel chu an ko va, a hnenah chuan, "Thlamuang takin awm la, tho rawh; a ko va che," an ti a. 50 Tin, ani chuan a puan a paih a, a zuang tho va, Isua hnenah a kal a. 51 Tin, Isuan amah chu a lo bia a, "I chungah engtia ka tih nge i duh?," a ti a. Tin, mitdel chuan a hnenah, "Rabboni, hmuh theih ka duh," a ti a. 52 Tin, Isuan a hnenah, "Kal tawh rawh, i rinna hi i dampui a ni e," a ti a. Tichuan a hmu thei ta nghal a, kalkawngah chuan Isua a zui ta a.

Luka 2:10 Tin, vantirhkoh chuan an hnenah, "Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. 11 Vawiinah hian in tan Davida khuaah Chhandamtu a piang ta, Lal Krista chu.

Rom 1:1 Paula, Isua Krista bawih, tirhkoh ni tura koh, Pathian Chanchin Tha hril tura tihhrana chuan, 2,3 (chu Chanchin Tha, a Fapa kan Lalpa Isua Krista thu chu, Pathianin hman laiin a Lehkha thianghlimah chuan a zawlneite kain a tiam tawh a; ani chu tisa lam thu-ah chuan Davida thlaha piang a ni a, 4 thianghlimna thlarau lam thu-ah erawh chuan mitthi zing ata a thawhlehna chuan Pathian Fapa a nih nasa takin a hriattir a; 5 a hming avanga rinna chu hnam tin zinga mi awihtir turin, amah avang chuan khawngaihna leh tirhkoh nihna kan chang ta;   

Rom1:16 Chanchin Tha chu ka zahpui si lo va; tupawh a ring apiangte tan chhandamna tura Pathian thiltihtheihna a ni si a; atirin Juda mi tan a ni a, tin, Grik mi tan pawh a lo ni leh a.
1:17 Chu miah chuan rin lehzual nan, rinnain Pathian felzia chu a lo lang a, “Mi fel chu rinnain a dam ang,” tia ziak ang khan.

    Zaninah hian Kristian Thalai Pawla ka member puite, He kan conference hmang tura rawn inkhawm zawng zawng te leh Kohhranhote kan conference hun tawp kan hman mek lai hian kan Lalpa Isua Krista hmingin chibai ka buk thar leh duh che u a..
    Nikum lam atang tawh khan a hminga leader ni ve ta chu zanin ang hunah hian thusawi turin ka la ding ve ngei awm si a, tiin engnge ka sawi ve ang aw... tih ka ngaihtuah thin a. A nihna takah chuan kan hruaitu hmasa te thu lo sawi tawh dan rilruin a ngaihtuah lo thei lova.. Eng nge ka sawi ve ang? tih chu keimah leh keimah ka inzawhna ngai bawk a ni leh thin..
    Kawng hrang hrangin ka inbuatsaih chho ve zel a.. Bial Committee in conference thupui tur kan han thlan khan ka rilrua ka lo inbuatsaih ve tawhna te her danglamin a awm ka ti mai a... Chumi avangin zaninah hian thupui hlawm lian tak tak pahnih sawi ka tum ta a ni
    Nizan lamah te, vawiin lamah te khan thupui sawi ngaihnawm tak tak kan ngaithla tawh a.. khang te kha sawi tawh kher lo ilangin..

1.     Isua kan mamawh chhan/Engvangin nge Isua hi kan mamawh?
    Zaninah hian tun tuma kan thupui Thalaite mamawh Isua Krista tih atanga la chhuakin a hmasa zawk atan chuan Engvangin nge Isua hi kan mamawh tih han sawi hmasak ka tum a.  Nikum lam khan he kan Conference thupui ang deuh hian Bial Conference-ah khan Khawvel mamawh Isua Krista tih kan thlang tawh a... KTP General Conference-ah khan chutiang chiah chu kan thupui a lo ni tawh bawk a... Tichuan kei ngei pawhin kan branch-a ka thusawinaah he thu hi kum tir lam khan ka lo sawi ve tawh bawk a... Tichuan, kuminah he thu ‘Thalaite Mamawh Isua Krista’ tih kan han thlang veleh ta chiah mai hian ngaihtuahna a ti kal thui hle mai.. Khawvel hian Isua hi a mamawh a, Thalaite hian Isua hi kan mamawh takzet a ni tih a lang chiangin ka hria.  Isua Krista Khawvel mamawh chhanna ti te pawhin thusawi thiam tak tak te sawi pawh kan ngaithla fo tawhin a rinawm..
    Sap ramah chuan an hausa lutuk tawh a, an duh zawng apiang an lei thei a, an duh duhin an nung a, enghelh nei lovin Isua pawh an mamawh tawh lo a ni ber mai, tih an sawi thin lai kha a la rei lo hle mai. Hetiang deuh hian Isua mamawhna hi kan ramah pawh a tlahniam ve ta niin a lang. Khawvela thil chi hrang hrang, mamawh mai pawh ni lo, duh duh nei thei tawh chuan engtin nge Isua a mamawh tih a hriat theih tawh ang.. ti rawh u.. Hla siamtu chuan-
    Engtikah nge khawvel hian Isua a mamawh tih hi kan hmuhfiah  ang le.
tiin a lo siam hial a ni.
    Dik tak chuan Isua hi kan mamawh tih kan hriat loh vang a ni.  Isuaah hian kan mamawh zawng zawng a awm tih kan hriat loh vang a ni. Khawvel awm tirh ata tun thlengin Isua mamawh loh hun lai hi awm thei ^wm pawhin a lang lo. Kan mamawh lutuk a kan mamawh tih pawh kan inhre tawh lo zawk niin a lang. Ril\am lutuk avanga chaw chakna a reh thin ang mai hi a ni ber awm e.
    Eizawnna kawngah rual awt lutuk bik lovin kan awm a, damchhung khawsak inrelbawlna kawngah pawh fing leh fel tawkin kan inhria a, mamawh dang nei tawh loin kan inhria a. Chu chuan engmah ngaihpawimawh lohnaah min hruai lut a, Midang mamawha kan inhriat loh tlatna chuan midang tana thil tha ti turin kan tha a ti \hum a. Pathianina min siam dan mahnia awm thei lo, (Social Animal) midangte nena inring tawn leh cheng ho tura siam kan ni tih pawh kan intheihnghilh zo ta ni berin a lang.  Hengte avang tak hian Isua kan mamawhna hi a nasa telh telh mai niin a hriat a ni.
    Khawvela kan awm chhung hian mi thiltithei leh fing ber pawh ni ila, midang tanpuina mamawh lo ber leh mahni intodelh ber pawh ni mah ila, a tawp khawkah chuan Isua hi kan mamawh tho tho. Kan thih hnua chatuan hmuna kan awm dan tur i ngaihtuah thar leh ang u. Lal Isua kan mamawha kan auh loh theih loh hun a la thleng dawn. Duh ila duh lo ila kan la thi dawn si a, chutih hunah chuan kan thlarau hian Lal Isua hi a la tawk tho tho dawn. Khawvela nuamsa ber leh mamawh nei lo ber pawhin Isua a lo mamawhzia a la hre dawn a ni.
    Mitdel Bartimaia kha chuan Isua a mamawh hle mai, “Isu, Davida fapa, min khawngaih rawh,” tiin a au mai ni lovin an khap hnuah pawh a au ring zual sauh a nih kha. Hetiang renga kan awm chho zel a nih chuan kan hma hun lo thleng tur hi a duhawm tehchiamin a rinawm loh. Isua mamawh lo hi kan ang em mai
    Kan khawvel nun dan atanga Isua kan mamawh dan kan sawi nial nual a. Hetiang zawng hian Isua kan mamawh chhan Bible kan hmuh dan tlem azawng han sawi leh ila
1.    Phurrit phur te tan chawlhna a ni. Mat 11:28 "Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u.
2.    Thlarau atana chawlhna a ni. Mat 11:29 Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang.
3.    Tuihal te tan tuihal rehna a ni, Johana 4:14 tupawh an hnena ka pek tur tui in apiang erawh chu kumkhuain an tuihal lo vang, keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho vang," a ti a.
4.    Beidawngte tan beiseina a ni.  Sam 42:5 Aw ka nunna, engah nge i kun reng? Engah nge ka chhûngah hian i buai ni? Pathian beisei rawh: a hmêla damna avângin Amah chu ka la fak dawn si a.
5.    Chatuan Boralna ata chhanchhuaktu/Nunna petu a ni.  Johana 11:25  Tin, Isuan a hnenah, "Kei hi thawhlehna leh nunna chu ka ni; tupawh mi ring chu thi mah sela a nung reng ang; leh Tirhkohte Thiltih 3:15 Nunna Siamtu chu in that a; nimahsela Pathianin ani chu mitthi zing ata a kai tho leh a; chu chu a hretute kan ni e.
6.    Mibote tan kawng leh entu eng a ni. Johana 14:6 Isuan a hnenah, "Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.  leh
Johana 1:9 Eng tak mi tin ti eng thin kha a awm a, khawvelah a lo kal mek a ni.
7.    Mitthi te tan nunna leh thawhlehna a ni. Johana 11:25  Tin, Isuan a hnenah, "Kei hi thawhlehna leh nunna chu ka ni; tupawh mi ring chu thi mah sela a nung reng ang;
8.    Thian neilote tan thian a ni  Johana 15:14 Thu ka pek apiang che u in tih chuan ka thiante in ni ang. 15:15 Bawih ka ti leh tawh lo vang che u; a pu thiltih bawihin a hre si lo; thiante ka ti tawh zawk ang che u; Pa hnena thil ka hriat zawng zawng in hnenah ka puang tawh si a.
9.    Ril tamte tan chaw a ni Johana 6:35 Tin, Isuan an hnenah, "Kei hi nunna chhang chu ka ni; tupawh ka hnena lo kal chu a ril a tam lo vang, tupawh mi ring chu engtikah mah a tuihal lo vang.
10.    Mangang leh hlau te tan Thlamuantu a ni
Johana 14:27 "Thlamuanna ka hnutchhiah a che u; keima thlamuanna ka pe a che u; khawvelin a pek angin ka pek loh che u hi. In thinlung mangang suh se, hlauh pawh hlau suh se.

    He Isuaah hian kan mamawh chhanna kim a awm a ni.  A mamawhtute hnena inpuang thin Lal Isua hi i au ang u.

2.    Chanchin Tha Kan mamawh chu

    Kan thupui pahnihna atan Chanchin Tha kan mamawh tak chu enge tih in zir ho leh dawn teh ang.
    Tunlai khawvelah hian Chanchin tha lo hi hriattur a tam teh e ti rawh u, tunkar kaltaa kan veng chanchin ringawt pawh kha han thlir ila.. Information mike atanga puan chanchin tha lo (Mitthi chanchin) hriat tur a tam ti rawh u... zep thu a cheng lo.. Mizo kristian tena rapthlak kan tih khawp kan vengah ngei a thleng a ni ti rawh u  Khawvela kan awm chhung hian heng chanchin thalo tak tak hian min la deng zel dawn chu a ni a. Khawvel thilah chuan kan tana chanchin tha han ni ve chhun te pawh hian a va daih rei lo teh lul em. Chuvangin Lal Isua Chanchin Tha hi sawi tam a tul a, hriat tam tluk a awm lova, hei aia chanchin ngaihnawm leh tha chungchuang hi a awm lo.
    Kan Pathian thu chhiar inziahna Rom lehkhathawn hi tlem te in han sawi ve lawk ila
Rom Lehkhathawn :
1.    Paula hi Rom khuaah hian a la zin lo a, zin tumna a neih avanga ziak niin a lang.
2.    Ziah hun leh hmun : AD 58 velah Korinth khua atanga a ziah niin sawi a ni
3.    Paula Chanchin |ha Bu tia vuah hial a ni.
4.    Kristian Thurin zawng zawng awm lo mahse Kristian Sakhaw thu thuk sawifiah tumna bu a ni.
5.    Martin Luthera chuan, “Thuthlung Thar bu pawimawh ber a ni a, Chanchin |ha Hlu lai ber a ni.” a ti hial a ni.
6.    John Calvina chuan, “Miin he bu hriatthiamna hi a va neih thlen phawt chuan, Pathian Thu ro hlu duhawm ber thlen theihna kawngkaah a dak lut a ni,” a ti

    Chuti khawpa lehkhabu pawimawhah chuan Paula hian a bulah..
1:1 Paula, Isua Krista bawih, tirhkoh ni tura koh, Pathian Chanchin Tha hril tura tihhrana chuan,
tiin bul a tan a ni
1:3 ,2 (chu Chanchin Tha, a Fapa kan Lalpa Isua Krista thu chu, Pathianin hman laiin a Lehkha thianghlimah chuan a zawlneite kain a tiam tawh a; ani chu tisa lam thu-ah chuan Davida thlaha piang a ni a,
1:4 thianghlimna thlarau lam thu-ah erawh chuan mitthi zing ata a thawhlehna chuan Pathian Fapa a nih nasa takin a hriattir a;

tiin Pathian Chanchin |ha chu enge a nih a rawn sawi fiah a: Tirhkohte thiltiha kan hmuh angin
    A fapa Isua Krista hi a ni; chanchin tha chu...
    Pathianin a Thu buah Zawlnei hmangin a tiam a
    Tisaah lo changin Davida thlahah a piang a,
    Thihna ata tho lehin Pathian Fapa a nihzia a lantir a,
    Amah rin chu chhandamna a ni.
    Ref. T.T. 2:14-36; 3:12-26; 10:34-43)

2.    Rom 1:16-17 kan chhiar takah khan Rinna avanga Chhandamna chan chungchang a sawi ber a, ‘Rom lehkhathawn laimu/khaikhawmna a ni,’ tih a ni thin.
He bible changa kan hmuhin a rawn sawi dan chuan :
a)    Chanchin Tha chu zahpui theih a ni. Mahse Paula hian ka zahpui lo a ni a ti; T.T. bu kan chhiar chuan Paula hian Chanchin Tha zahpuina awm tak takah a zahpui lo tih kan hmu - Philipi taninah a tan phah a (T.T. 16:22-24) Thessalonika atangin azan azanin an hnawhchhuah phah a, Beroia khuaah a tlanchhia a (16:5-10) Atheni Mifingten an nuihzabur a (17:18,32) Korinth khaw mifingte tan thu atthlak a ni a, Judaten thu dik lovah an puh bawk si (I Kor 1:18-24) Chuti khawp a ni chung pawhin Paula hian ka zahpui lo, Zahpui ahnekin ka chhuang a ni. Ka hril lo thei lo a ni, a tihna ang a ni.
b)    Chanchin Tha chu A ring apiangte tana chhandamna tura Pathian thiltihtheihna a ni.  Hetah hian mi zawng zawng tan; mitin ta tur Chanchin Tha a ni (Luka 2:10) tih kan hmu. Mahse pawimawh em em mai kan hriat hmaih hauh loh tur chu mi zawng zawng chu chhandamin an awm lo tih hi a ni. A chhan chu a ring apiangte tan tih a ni tlat a. Amaherawh chu tupawhin an ring thei tih hi hriat hmaih loh tur a ni leh bawk ang. Tichuan, chu Chanchin Tha chu a ring apiangte tan chhandamna thlen tura Pathian thiltihtheihna a lo ni ta a. Kan hriat fo thin dan zawkin sawi ta ila, Lalpa Isua ringtu chu chhandamin a awm tihna a ni.
    Helaia Pathian thiltihtheihna tih lo lang hi tlem han sawi leh ila:-
    Heb 4:12 -ah chuan, “Pathian thu hi a nung a, thil a ti thei a, khandaih hriam tawn engang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a, thinlunga ngaihtuah leh tumte hi a hre nghal thei a ni.......”  tih kan hmu a. heta Pathian thiltihtheihna hi Chanchin Tha chu a ring apiangte tana chhandamna tura Pathian thiltihtheihna a tih nen khan thu hmun a ni a. Chung a thiltihtheihte chu a nep lo hle tih pawh kan hmu nghal bawk a ni.  Heti zawng hian sawi ila, Chanchin Tha chu a ring apiangte tana chhandamna tura Pathian thiltihtheihna infawkkhawmna hmun a ni. Sual Kulh thiat theihna thiltihtheihna a nei a; Siamthat theihna thiltihtheihna a nei a; Misual thi tur Isua ruala an khenbeh pawh a thih dawn darkarah a chhanhim thei a ni.  Khawvela mi beidawng, beidawn luat avanga mahni intihhlum duhna hial nei te pawh a chhanchhuak thei a ni. Khawvel thiltihtheihna chuan tihchhiattheihna thiltihtheihna an nei thin a, he chanchin \ha hi chu a ni ve lo. Misual ber pawh mi tha berah a chantir thei a.  kan ramah pawh kawng hrang hrangin siam\hat theih a va nei tam em!!

Chanchin Tha hlutna :
    Zaninah hian Chanchin Tha hlutna hi kan sawi zo seng lovang a, kan sawi fiah thiam bawk hek lova, mahse a hlu a ni tih erawh chu a changtute nunah a chiang thin.  A chhan chu a chang tawh chuan an thlah leh phal tawh lo. Kan piangthara kan da leh thin pawh hi eng dang niin a lang lo; Chanchin Tha hlutna hi kan hre chiang tawk lo mai niin a lang. Chatuan nunna petu tluka hlu hi kan hria a nih chuan thudang, anih loh chuan he Chanchin Tha tluka hlu hi khawvelah leh hmun dangah pawh a awm lo ti ila a chiang mai awm e. Kan hnathawhnaah te, kan sikul kalnaah te, kan inchhung khurah te hian Chanchin Tha hi kan thil neih hlu ber a nih zel a va tul em!! Nitina kan hun hmanna ah he chanchin Tha hi kan thil neih hlu ber a nih loh chuan Khawvel ropuina leh nawmsaknaten min rawn nanchin hunah a aia hlu zawk kan nei tih hi kan lo intheihnghilh palh ang tih a hlauhawm a ni.  Hebrai bung 11 a Chanchin Tha avanga an neih rohlu leh an nunna hial lo chan tawh tu... nasa taka tihduhdah tuarte khan he chanchin tha hlutna hi chu an lo pawh chiang awm ngawt mai.

Chanchin Tha chu engtinnge kan tih ang?
    Chanchin Tha, chutiang taka hlu chu engtinnge kan tih ang?
    Marka 16:15 Tin, an hnenah, "Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u. tiin Lal Isuan vana a lawn dawn khan a zirtirte a chah a
    Khawvela thil hlu reng reng hi chu mahni tana pumbilh chi vek a ni mai e ti rawh u. Mahse he Chanchin |ha makna em em chu sem chhuah a, midang pek ve zel tur a nihna hi a ni. Khawvel thil hlu dang chu midang kan pek veleh kan nei lo nghal thin a. He chanchin tha erawh hi chu a ni ve lo, kan pek chhuah apiangin kan neih belh zel thung tlat hi a makna lai tak a chu a ni.  Khawvel thil hlu chu pe chhuak lo leh sem lovin neih belh leh lak belh zel kan tum a, he chanchin tha neih belh dan erawh chu sem chhuah a pek chhuah a ni tlat a ni.
    Tin, Chanchin |ha makna dang leh chu a nei tawh leh chang tawh tu chuan midang pek a chak tlat zel hi a ni. Hriat belh an chak a, pek chhuah chu neih belh zel na a ni tih an hriat avangin an zah pui lova an \ulpui zawk thin a lo ni.
    Chutih rual chuan Keini ho hian Chanchin tha hi kan ngawihbopui ang tih a hlauhawm khawp mai.
    Pil thei lo tura ngaih Titanic lawng pil ta khan mi 1500 vel chu a pilpui a nih kha. A kiang hnai mel khat vel lekah khan lawng lian pakhat chu a ding reng a, a duty lai niin chhanchhuahna hna han thawk sela chuan mi chuang zawng zawng kha an chhan chhuak vek tur hi a ni a. Mahse a duty loh lai a nih tlat avangin a thawk chhuak ta lo a nih chu!
    Chutiang deuh chuan Kristian |halai te zingah pawh hian i ti teh ang Chanchin Tha hril tura duty loh lai (off duty) kan tam thin avangin mi tam tak chu an thi mek a nih hi. Bawngkawn Upa pakhatin kan Biak Ina a sawi ka hriat reng chu “Kristian nunah hian chawlh a awm ve lo.” a tih kha a ni.. Rawngbawl tura Chhandam Thalaite hian khawvelin a mamawh em em he chanchin tha hi kan thil tuma Krista Chanchin Tha puan darh tia kan neih ang ngei khan, khawvel hian a mamawh zia hriattir ila, chawl lovin i puang darh zel ang u.

He tehkhin thu hian ti tawp ilangin:
    Mi pakhat hi Inrinni tlai apiangin khawlaia hmun pakhatah hian a ding a, mi lo kal apiang te chu Pathian Thu ziak a lo pe thin a. Kum 40 chhung a din hnu pawhin a sawtna reng reng a hmu si lova, a beidawng chu a ding duh ta lova.
    Kum eng emaw zat a ral hnu chuan chu hmuna a va kal leh chu a dinna thinah ngei khan tlangval pakhat hi a lo ding a, Pathian Thu ziak chu a lo pe ve a.
Putar chuan a din chilh a, .Tlangval, eng vangin nge he hmunah hian i din chu le? a ti a.
    Tlangval chuan, "Ka pu, thil awmdan chu hetiang hi a ni e. Kum tam tak chu hetah hian putar pakhat a ding \hin a. Kei pawh hi Pathian Thu ziak min pek avanga piangthar ka ni. Putar chu ka hmu ngai ta lova, Pathianin a hnenah a hruai chho tawh a nih ka ring. He hmun ruak hi luah ngei tula ka hriat avangin a dinna thin hmunah hian keimah ka ding ve ta mai a ni," a ti a.
    Tlangvalin thu a hrilh mawlh mawlh lai chuan putar chu a mittui a tla zawih zawih mai a, "Tlangval, keimah hi thu ziak petu che chu ka ni e; Pathianin min khawngaih sela, Isua Krista lo kal leh thlenga he hmuna ka din theihna’n hmun hi min kian leh ta che," tiin a dil ta a ni an ti.
    Mi tena an mamawh em em he chanchin tha hi kan nei tawh a nih ngai chuan zanina lo kal khawmte hian kan hrilh theih hun chhung a rei tawh lo mai thei... rei tak la dam tur pawh kan ni maithei. A harsat chang a awm ang, hrehawm tawrh a ngaih hun pawh a awm ngei ang.. Thalaite phei chu kan programme a hlimawm reng fo lo lo ang.. Kohhranah ngei pawh hian Inkhawm chakawm loh hun a awm ang.. chutiang hun a lo thlen pawh chuan kan rawngbawlna kan hlen a, amah Lal Isua hnen kan thlen huna sawi tur kan neih ve theih na turin.. He Thalaite mamawh Isua hi... he chanchin tha hi theihtawp chhuahin i hril zel ang u..
    Lalpan a thu malsawm rawh se.